မှောင်ရိပ်ခိုမိသောနှလုံးသား

ပွင့်နေတဲ့တံခါးလေး
ကျွန်တော် မပိတ်ခဲ့ပါ....

အချစ်ဟာ
ဘယ်က စသလဲ?
ဘယ်မှာ ဆုံးသလဲ?
ကျွန်တော် မသိချင်....

နယူတန်ပြောတဲ့ အချစ်အကြောင်း
ရိုမီယိုပြောတဲ့ အချစ်အကြောင်း
လီယိုနာဒိုပြောတဲ့ အချစ်အကြောင်း
ဒဿဂီရိပြောတဲ့ အချစ်အကြောင်း
မောင်ချောနွယ်ပြောတဲ့ အချစ်အကြောင်း
အောင်ချိမ့်ပြောတဲ့ အချစ်အကြောင်း
ဘာတစ်ခုမှ မသိချင်!
ကိုသိချင်တာ
အချစ်ကပြောတဲ့ အချစ်အကြောင်း...

သူပြောပြခဲ့ပါတယ်!
အချစ်ကပြောတဲ့ အချစ်အကြောင်းအဆုံးမှာ
ကို ပြန်ဆက်ပေးချင်တဲ့ သူ့နှလုံးသားတွေ
ကို ပြန်ခြယ်ပေးချင်တဲ့ သူ့အလှတွေ
ကို ပြန်လျှောက်လှမ်းစေချင်တဲ့ သူ့ခရီးလမ်းတွေ
ကို ပြန်ပြီး.....

စူးစူးနစ်နစ်ထိုးဝင်ခဲ့တဲ့
အပြစ်မရှိတဲ့ ဆူးတစ်ချောင်းကို
ကျွန်တော် ခုံရုံးမတင်ရက်ပါ...

ကိုယ့်ကိုယ်ကို
အကျဥ်းချခဲ့ခြင်းတွေအတွက်
​အယူခံ မဝင်လိုတော့ပါ....

ဝင်လာခဲ့ပြီးနောက်
သူပြန်ထွက်သလား
ကျွန်တော်မသိပါ...

ပွင့်နေတဲ့ ထိုတံခါးလေး
ကျွန်တော်..................


လင်းယံခ