ထွက်သွားသူ ပြန်လာစေသောနည်းတစ်ခု

အခုတလော ကျွန်တော်နှင့် ခင်မင်ရင်းနှီးသော မိတ်ဆွေအမျိုးသမီး တော်တော်များများ မိမိတို့၏ အမျိုးသားများ မိမိတို့နေအိမ်မှ ထွက်သွားသဖြင့် အတော်လေး ပူပင်သောက ရောက်နေကြသည်။ ကျွန်ုပ်သည်လည်း ထိုကိစ္စအတွက် နေ့စဉ်အချိန်နှင့်အမျှ စိတ်မကောင်းဖြစ်နေမိ၏။ မြန်မြန်ပြန်လာစေချင်တော့၏။ ယတြာအနေနှင့် တစ်နည်းမဟုတ် တစ်နည်း ပြုလုပ်ပေးချင်မိ၏။ သို့သော် စဉ်းစားစရာ တစ်ခု ရှိနေသည်မှာ အားလုံးသော သူများသည် မြန်မာပြည်မှာ မဟုတ်။ နိုင်ငံခြားတိုင်းပြည်တွေမှာ ရောက်ရှိနေကြ၏။ နိုင်ငံခြားတိုင်းပြည် ဆိုသည်မှာ ယတြာ လုပ်ရသည်မှာ ခက်ခဲလေ၏။

သို့သော် ကျွန်ုပ်၏ မူရင်းစိတ်အမှန်ကို ပြောရပါမူ ထွက်သွားသော သူတို့၏ ဘ၀အဖော်များကို အမြန်ဆုံး ပြန်လာစေချင်လွန်းလှတော့၏။ အခါတိုင်း နှစ်ယောက်အတူ နေထိုင်ခဲ့သော အိမ်လေးတစ်လုံးတွင် အခုတော့ တစ်ယောက်တည်း အထီးကျန်စွာ ရှင်သန်နေရ၏။ မည်မျှလောက် ချောက်သွေ့နေလေမလဲ။ အခါတိုင်းတွင် စကားသံများ၊ စတဲ့ နောက်တဲ့ အသံများနှင့် လွင့်ပျံ့နေသော ဤအခန်းလေးထဲတွင် မည်မျှလောက် တိတ်ဆိတ်နေမည်လဲ။

အခါတိုင်း စားအတူသွားအတူ လာအတူနှင့် ဘ၀ကို ပျော်ရွှင်စွာဖြတ်သန်းလာခဲ့ရာမှ ရုတ်တရက် ကောက်ကာငင်ကာ ဆိုသလို တစ်ယောက်သောသူက အိမ်ကနေ ထွက်ခွါသွားခဲ့သည်.။ ကျန်နေခဲ့သော သူသည် မည်မျှလောက် လွမ်းဆွေးနေမည်နည်း။ ကျွန်ုပ်သည် ထိုအကြောင်းများကို တစ်ယောက်တည်း ညဘက်တွင် ထိုင်၍ မအိပ်နိုင်ပဲ စဉ်းစားနေခဲ့၏။ ကျန်နေခဲ့သော ကာယကံရှင်များ၏ စိတ်တွင်းသို့ ၀င်ရောက်ကာ ခံစားမိ၏။ ထိုအချိန်တွင် ကျွန်ုပ်၏ စိတ်နှလုံးသည် ချက်ချင်းဆိုသလို နွမ်းလျသွားရတော့၏။ ညှိုးနွမ်းသွားတော့၏။

ထွက်သွားသောသူဘက်ကို ကြည့်လျှင်လည်း သူသည် ထွက်သွားရမည့် အကြောင်းတစ်စုံတစ်ရာ မရှိပါပဲလျှက်တော့ အိမ်ကနေ ထွက်ခွါသွားမည် မဟုတ်။ အိမ်ကနေ ထွက်ခွါသွား၇လောက်အောင် အကြောင်းတစ်စုံတစ်ရာ ရှိနေသောကြောင့်သာ သူသည် အိမ်ကနေ ထွက်ခွါသွားခြင်း ဖြစ်လိမ့်မည်။ သို့သော် အိမ်တွင် ကျန်နေခဲ့သော သူသည်၎င်း အိမ်ကနေ ထွက်ခွါ သွားသူသည်၎င်း ထိုကဲ့သို့ တစ်ယောက်နှင့် တစ်ယောက် ဝေးကွာနေယုံမျှဖြင့် နှစ်ဦးကြားက ပြဿနာသည် ပြေလည်သွားမည် မထင်။ နှစ်ဦးနှစ်ဘက် တွေ့ဆုံဆွေးနွေး၍ အပြန်အလှန် နားလည်ကာ ခွင့်လွှတ်ကာ၊ သာယာသော မနက်ဖြန်များအတွက် ရှေ့ဆက်ကြခြင်းသည်သာလျှင် အကောင်းဆုံး အစစ်မှန်ဆုံး နည်းလမ်းများပင် ဖြစ်ပေလိမ့်မည်။ ဖြစ်နိုင်ကြပါစေဟုလည်း ဆုတောင်းလိုက်ပါ၏။

ထို့ကြောင့် ကျွန်ုပ်သည် မည်သည့်နိုင်ငံတွင် မဆို လုပ်ရလွယ်ကူသော ထွက်သွားသူ ပြန်လာစေသော အောက်ဖော်ပြပါ ယတြာနည်းကို ထပ်မံ၍ ဖော်ပြပေးလိုက်ရပါသည်။ အဆင်ပြေကြပါစေဟုသာ တိုးတိတ်ငြင်သာစွာ တစ်ယောက်တည်း ဆုတောင်းပေးလိုက်ပါသတည်း။

တနင်္ဂနွေသားသမီး အိမ်အမြန်ပြန်လာစေရန်....
ကြာသပတေးနေ့တွင် နံက် (၆း၀၀) မှ နံက် (၇း၃၀) အတွင်း မြောက်အရပ်ကို မျက်နှာမူကာ သောကြာနံအစားအစာ အစ်ခုခုကို (ဥပမာ-သီးသီး၊ သစ်တော်သီးစသည်) စားရင် ပြန်လာစေဖို့ ဆုတောင်းလိုက်ပါ။

တနင်္လာသားသမီး အိမ်အမြန်ပြန်လာစေရန်....
သောကြာနေ့တွင် နံက် (၆း၀၀) မှ နံက် (၇း၃၀) အတွင်း အနောက်တောင် အရပ်ကို မျက်နှာမူကာ စနေနံအစားအစာ တစ်ခုခုကို (ဥပမာ-နွားနို့၊ ထန်းလျှက်စသည်) စားရင် ပြန်လာစေဖို့ ဆုတောင်းလိုက်ပါ။

အင်္ဂါသားသမီး အိမ်အမြန်ပြန်လာစေရန်....
စနေနေ့တွင် နံက် (၆း၀၀) မှ နံက် (၇း၃၀) အတွင်း အရှေ့မြောက်အရပ်ကို မျက်နှာမူကာ တနင်္ဂနွေနံ အစားအစာ တစ်ခုခုကို (ဥပမာ-အုန်းသီး- အုန်းရည်စသည်) စားရင်း ပြန်လာစေဖို့ ဆုတောင်းလိုက်ပါ။

ဗုဒ္ဓဟူးသားသမီး အိမ်အမြန်ပြန်လာစေရန်....
တနင်္ဂနွေနေ့တွင် နံက် (၆း၀၀) မှ နံက် (၇း၃၀) အတွင်း အရှေ့ အရပ်ကို မျက်နှာမူကာ တနင်္လာနံအစားအစာ တစ်ခုခုကို (ဥပမာ-ကြံ၊ ၊ ကော်ဖီ၊ ကိတ်မုန့် စသည်) စားရင် ပြန်လာစေဖို့ ဆုတောင်းလိုက်ပါ။

ကြာသပတေးသားသမီး အိမ်အမြန်ပြန်လာစေရန်....
တနင်္လာနေ့တွင် နံက် (၆း၀၀) မှ နံက် (၇း၃၀) အတွင်း အနောက်တောင် အရပ်ကို မျက်နှာမူကာ အင်္ဂါနံအစားအစာ တစ်ခုခုကို (ဥပမာ-ဇီးသီး၊ ဇီးယိုစသည်) စားရင် ပြန်လာစေဖို့ ဆုတောင်းလိုက်ပါ။

သောကြာသားသမီး အိမ်အမြန်ပြန်လာစေရန်....
အင်္ဂါနေ့တွင် နံက် (၆း၀၀) မှ နံက် (၇း၃၀) အတွင်း တောင်အရပ်ကို မျက်နှာမူကာ ဗုဒ္ဓဟူးနံ အစားအစာ တစ်ခုခုကို (ဥပမာ-လဘက် ၊ လဘက်ရည်စသည်) စားရင် ပြန်လာစေဖို့ ဆုတောင်းလိုက်ပါ။

စနေသားသမီး အိမ်အမြန်ပြန်လာစေရန်....
ဗုဒ္ဓဟူးနေ့တွင် နံက်(၆း၀၀) မှ နံက် (၇း၃၀) အတွင်း အနောက်အရပ်ကို မျက်နှာမူကာ ကြာသပတေးနံ အစားအစာ တစ်ခုခုကို (ဥပမာ- ပေါင်မုန့်- ပဲပြုတ်စသည်) စားရင် ပြန်လာစေဖို့ ဆုတောင်းလိုက်ပါ။